Navenda Nûçeyan – Fermandariya Giştî ya Yekîneyên Parastina Jin (YPJ) der barên gef û êrişên dewleta Tirk a dagirker û çeteyên wî û metirsiya vegera DAIŞˋê daxuyaniyek da.

 Daxuyanî wiha ye:

 "Komên cîhadîst û hêzeke wekî HTŞ'ê ku ji aliyê hêzên navneteweyî ve li ser esasê konseptekê hatine amadekirin û ji aliyê Komara Tirk ve tên birêvebirin, bê ku rastî ti astengî û berxwedanekê werin, gihiştin Şamê. Rejîma Baasê ya 61 salî di demeke kurt a 12 rojan de hilweşiya. Sedema ku rejîm di demeke ew çend kin de bê berxwedanî têkçû, ew bû ku di statûkoparêziyê de israr kir û di çareserkirina pirsgirêkên herî bingehîn de, bi taybetî jî pirsgirêka Kurd, bi awayekî kevneperest tev geriya. Ger rêveberiya Esed ji bo demokratîkbûna Sûriyê gav biavêta, îro ev rewş wê derneketiba holê.

Ev atmosfera serkeftinê ya ku ji aliyê cîhadiyan ve hatiye afirandin, wê bandorên xwe yên demkî hebe. Sûriyeya nû ya ku wê bi vê zihniyetê ava bibe wê ji afirandina Efganîstana duyem wêdetir neçe. Lê Sûriye ji dîrokê vir ve malavaniya civakên cuda yên etnîkî û olî kiriye. Em bi matmayî temaşe dikin ka çawa hin kes bê ku li pêkhateya sosyolojîk a Sûriyeyê meyze bikin wekî ku ji komkujiyên ev pergal bi xwe bîne ne agahdar in, ji vê rewşê kêfxweş dibin.

Bêguman dewleta Tirk ji şerê ku 13 sal in gelê Sûriyê tê de ye berpirsyar e. Di van 13 salan de dewleta Tirk û çeteyên wê her tim êrîşî herêmên Bakur û Rojhilatê Sûriyeyê kirin. Niha jî bi rêya çeteyên artêşa neteweyî ya Sûrî  ku DAIŞ bi xwe ye, êrîşî destkeftiyên Bakur û Rojhilatê Sûriyeyê yên ku li ser bingehê azadiya jinê ava bûye, dikin. Hêzên me bi pêşengiya YPJ’ê herêm ji belayeke mezin a mîna DAIŞ’ê rizgar kirin û herêm veguherandin girava aramiyê ku hemû pêkhateyên cuda yên olî û etnîkî di nava aramî û bextewariyê de dijîn. Lê belê, ev qada aramiyê niha bûye armanca dagirkeriya Tirk. Ev xakên ku di pêşengiya YPJˋê de, ji aliyê artêşa jin û gelan û QSD’ê ve tên parastin, careke din bi gefa DAIŞ û Komara Tirkiyê de rû bi rû ne.

Di vê pêvajoyê de ji bo gelên Kurd, Ereb, Durzî, Ermenî, Asûrî û Suryan jî ku em bi hev re li dijî DAIŞ û Komara Tirk şer dikin û destkeftiyên xwe diparêzin, xeteriyên mezin hene. Ji aliyekê ve ji ber ku pêkhateyên Rêveberiya Xweserin, rasterast tên hedefgirtin û ji aliyê din ve jî MÎT dixwaze xwe bigihîne hin eşîran û hewl dide gelan bîne pêşberî hev. Li ser vê bingehê dixwazin li dijî hêzên me êrîş an jî provokasyonan organîze bikin, civat û hin komên Ereb û eşîrên li herêmên Reqa, Tebqa û Dêrazorê tehrîk bikin. Weke YPJ’ê di serî de jinên Ereb em bang li tevahî civaka xwe dikin ku neyên van leyîstok û hîleyan.

MÎT di çarçoveya vê konsepta êrişê de planên êrişa li dijî kampa Holê û girtîgehên ku girtiyên DAIŞ'ê lê ne, dike.

‘Em di her warî de bi berpirsyariyeke dîrokî re rû bi rû ne’

Ji girtîgehên ku HTŞ'ê jî vala kirin hin çeteyên DAIŞ'ê hatin berdan. Ji ber vê sedemê herêma me di bin gefeke nû ya DAIŞ’ê de ye. Metirsiya kontrol li Sûriyê bikeve destê DAIŞˋê yan jî komên bi hişmendiya DAIŞ’ê tev digerin pir û pir zêde ye. Di roja îro de tê xwestin DAIŞ ku projeyeke Komara Tirkiyê ye bi navên cuda rewa bikin û hebûna wê bi cîhan û herêmê bidin qebûlkirin.

Di vê mijarê de tê xwestin ku qedera herêmê radestî hêzên herî paşverû yên cîhanê bê kirin. Lê Rojava ji bo gelên herêmê û mirovahiyê weke warê hêviyê wê bi pêşengiya YPJ’ê bi gelê me, gelan û jinan re têkoşîna hevpar bilind bike. Em di her warî de bi berpirsyariyeke dîrokî re rû bi rû ne.

Ji Til Rifat, Minbicê û niha jî Kobanê, armanca dawî ya êrîşên Komara Tirk û çeteyên wê, anku çeteyên DAIŞ'ê, dagirkirin û îlhaqkirina tevahî Rojava ye. Em bang li gel û jinên cîhanê dikin ku li hemberî van êrîşan dengê xwe bilind bikin û berpirsyariyên xwe bi cih bînin.

YPJ îro li her qadê li dijî êrîşên çeteyên DAIŞ’ê yên ku rasterast ji aliyê dewleta Tirk ve tên birêvebirin, li ber xwe dide. Wê vê berxwedaniyê heta dawiyê jî bidomîne.

Di cîhanê de hemû hêz pesna berxwedana YPJ’ê didin, lê belê îro ji pesindayînê zêdetir pêwîstî bi berfirehkirina refên berxwedanê hey. Divê em têkoşînê mezin bikin û belavî her derê bikin. Êdî dem hatiye ku em van êrîşên Komara Tirk a faşîst rawestînin û hesab jê bixwazin."