Silêmanî- Endama Tevgera Azadiyê Sara Reza der barê xebat û têkoşîna Viyan Caf de ji ajansa me re axivî û diyar kir ku jinên ciwan ên Başûrê Kurdistanê li ser xeta Viyan Caf têdikoşin.

Sara Reza di destpêkê de Viyan Caf û hemû cangoriyên Kurdistnê bi bîr anî û wiha behsa têkoşîna Viyan Caf kir: “Viyan Caf jineke pêşeng e û pêşengiyê ji Başûrê Kurdistanê re kir. Wê ev çalakî ji bo Rêber Apo, jinên Başûrê Kurdistanê yên mafên wan hatine binpêkirin û gelê Kurd pêk anî.”

‘Em ê li ser riya Viyan Caf bimeşin’

Sara Reza destîşan kir ku Viyan Caf di temenek biçûk de bi azadiya gelê xwe hesiyaye û dest bi têkoşînê kiriye û vê têkoşîna wê çavkaniya xwe ji hemû karesatên enfal û kîmyabaran û şerê navxweyî girtiye û got: “Li hemberî van hemûyan deriyê li dijî zilm û zoriya li ser jinan li çar parçeyan bi taybetî li Başûrê Kurdistanê vekir. Em weke jinên başûrê Kurdistan nameya Şehîd Viyan ku bûye manîfestoya jinên azad li Başûrê Kurdistan û çalakiya fedayane, dikin hêza têkoşînê. Em soz didin em ê her dem li ser riya Viyan, Sakîne, Evîn û Zîlanan bimeşin. Îro li Rojhilatê Kurdistan bi pêşengiya jinan bi dirûşma ‘Jin Jiyan Azadî’ serhildan tê kirin û ev ruhê têkoşînê dide diyarkirin.”