MEDÎNE MAMEDOGLU

Êlih – Çalakiya ku Tevgera Jinên Azad (TJA) bi dirûşma "Bi Jin Jiyan Azadî ber bi azadiyê ve dabû" destpêkirin berdewam dike û heta 8'ê Adarê Roja Jinên Kedkar ên Cîhanê dê bidome.

TJA'yê ragihand ku di 15'ê Îlonê de li Rihayê bi daxuyaniyekê dest bi xebatên xwe kiriye, li Şirnex û Stenbolê jî dest bi kampanyayê kiriye. Di mijarên sereke yên jinan de tundiya li ser jinan, pêşxistina civaka exlaqî û polîtîk, tecrîd û polîtîkayên şerê taybet ên ji Girtîgeha Îmraliyê li tevahiya civakê belav bûne. Jin di çarçoveya van mijaran de xebatên birêxistinkirinê li dar dixin. TJA bi serdana taxan hewl dide xwe bigihîjîne hemû jinan û di van hevdîtinan de li dijî polîtîkayên şerê taybet ên li Kurdistanê tên meşandin dê perwerdeya xweparastinê û jineolojiyê bide.

Endama TJA'yê Rûken Zeryam Işik behsa xebatên xwe yên di çarçoveya kampanyayê de û eleqeya jinan a ji kampanyayê re kir.

Rûken Zeryam Işik da zanîn ku ew bi pêwîstiya xwerexnekirina civakê bi taybetî jinan dizanin û got ku ew xebatên xwe di vî warî de dikin. Rûken Zeryam Işik destnîşan kir ku armanca wan a ewil ew e xwe bigihîjînin jinan û hişyariyê bidin û bi gotinên, "Dê kolan û taxek ku em neçinê nemîne."

'Dê xebatên xweser ên herêmî bên kirin'

Rûken Zeryam Işik, diyar kir ku kampanya wê 6 mehan bidome û got: “Kampanyaya me dê 6 mehan bidome. Me bi destpêkirina ragihandina daxuyaniyê re qonaxa yekem a vê kampanyayê da destpêkirin. Piştî meşê dest bi xebatên herêmî kirin. Me jî ji Êlîhê dest bi kampanyaya xwe kir. Me nîqaşên xwe yên herêmî kirin. Em gelek caran li ser rojeva ku em dikarin di rojeva jinan de çi bikin hatin cem hev. Em ê di rojên pêş de dest bi qonaxa duyemîn a kampanyayê atolyeyan bikin.”

'Atolyeyên me wê li kolan û malan bên lidarxistin'

Rûken Zeryam Işik diyar kir ku di atolyeyan de dê pêşî jin cih bigerin û piştre xebatên qadê bidomin û got:

“Em ê li ser mijarên şerê taybet û tecrîdê atolyeyan li dar bixin. Piştî wê, em ê atolyeyên li ser kuştina jinan pêk li dar bixin. Li gel van dê perwerdeya operasyonên navxweyî jî bên dayîn. Di vê lêkolînê de dê serdanên gel bên kirin û lêkolînên meydanî bên destpêkirin. Ev atolye dê li tax, kolan û malan bên lidarxistin. Em ê li her qadê bi jinan re hevdîtinê bikin û li derve atolyeyan li dar bixin. Em ê ji bo afirandina rojeva jinan, pêşî hişyar bikin û piştre bi rêxistin bikin.”

Rûken Zeryam Işik anî ziman ku li taxa ji bo ravekirina kampanyayê çûne ber atolyeyê ji aliyê jinên taxê ve baş hatine pêşwazîkirin û destnîşan kir ku vê nêzîkahiyê îradeya wan a ji bo xebata li qadê zêdetir kiriye.

'Em di warê destdirêjiya li ser jin û zarokan de kêm man'

Rûken Zeryam Işik der barê pêkhateya demografîk a Elîhê de axivî û diyar kir ku bajar ji ber rêxistinbûyîn û hişmendiya xwe bûye hedefa pergalê û wiha domand:

“Dema em vê derê ji aliyê herêmî û demografîk ve binirxînin, em ê bibînin ku Êlîh bajarekî kombûnê ye. Li vê derê welatiyên ku di salên 90'î de gundên wan hatin şewitandin dimînin. Ji çar aliyên Kurdistanê mirov dikare hevdîtinê bike. Ji bo vê jî ji aliyê pergalê ve weke herêmeke tampon dihat dîtin. Em weke tevgera jinê di vê mijarê de di nava helwesteke xweser de ne. Lê bi giştî em dikarin bibêjin ku Êlîh bajarekî siyasî ye. Di vê xalê de rêxistinbûneke xurt jî derdikeve holê.”

'Pergal civaka rêxistinkirî hedef digre'

Rûken Zeryam Işik bal kişand ser tundiya ku bi polîtîkayên şerê taybet ên li bajêr tên meşandin û wiha got: “Em dizanin ku bi projeyek taybet ji bo bajêr bi taybetî ji bo jinan tê xwestin ji gund heta bajar polîtîkayên şerê taybet bên meşandin. Di vê xalê de mirov dikare bibêje ku hişyar e lê bajarekî ku di salên dawî de herî zêde polîtîkayên şerê taybet lê tên meşandin e. Xistina civakekê meylek e ku ne tenê jin û ciwanan, li tevahî civakê belav bûye."

'Em ê bi du mijaran dakevin qadan'

Rûken Zeryam Işik diyar kir ku di lêkolîna dawî ya qadan de mijarên yekemîn dê polîtîkayên şerê taybet û tecrîd bin û got: "Li gorî nêrîna jinên ciwan, şerê taybet ji bo jinan ji çand û jiyana wan dûr bixe gelek argumanan bi kar aniye û ev pêvajo berdewam dike. Mînaka vê ya herî şênber me di bûyera Îpek Er de dît. Li ser vê yekê malbat hewl didin zarokên xwe hişyar bikin. Dîsa ev pêvajo ne tenê bi riya malbatê bi riya partiyê jî tê meşandin. Bi vê kampanyayê em ê kirinên şerê taybet bişopînin. Em ê pêşî di nava xwe de nîqaş bikin û piştre bi raya giştî re parve bikin.”