Navenda Nûçeyan- Tevgera Jinên Azad (TJA) dê di navbera rojên 13-14’ê Çileya 2024’an de li Amedê di bin sernavê "Zincîra Bêdengiyê: Hilweşandina Dîwarên li dora Girtiyên Siyasî yên Jin" de konferansek navneteweyî li dar bixe.

Konferansa ku dê li Otela Demîr a navçeya Sûrê bê lidarxistin, tê plankirin bi axaftina endama Parlamentoya Ewropayê, parlamentera serdema berê Martîna Anderson dest pê bike. Di roja ewil a konferansê de dê bi sernavên “Nêrîneke li girtîgehên Tirkiyeyê yên di roja me de”, “Tecrube û têkoşîna girtiyên jin ên siyasî” û “Di darizandin û girtinên siyasî de hiqûqa neteweyî û navneteweyî” panel bên lidarxistin.

Ji Filîpîn, Filistîn, Kolombiya û herêma Baskê ya Spanyayê dê panelîst tevli bibin

Di roja duyemîn a konferansê de jî li Tirkiye û herêmên cuda yên cîhanê binpêkirinên li dijî girtiyên jin ên siyasî dê bên nîqaşkirin. Bi konferansê armanc ew e ku tecrube, têkoşîn û berxwedana jinên girtî di qada neteweyî û navneteweyî de bên parvekirin û stratejî û rêbazên di qadên medya, huner, hiqûq û hwd. de bên nirxandin. Wê panelîstên ji Filîpîn, Filistîn, Kolombiya, Herêma Baskê ya Spanyayê, Katalonya, Îran û Başûrê Kurdistanê tevli bibin.