Stenbol – Saziya Mafên Mirovan û Wekheviyê ya Tirkiyeyê (TÎHEK) rapora xwe ya têkildarî Girtîgeha Tîpa L a Maltepeyê û Girtîgeha Tîpa T a Afyonkarahîsarê parve kir. Di raporê de hat gotin ku kapasîteya Girtîgeha Tîpa L a Maltepeyê hezar û 760 kes e lê 2 hezar û 188 kes tên ragirtin.

Di raporê de hat diyarkirin ku ji ber kapasîteya heyî tê derbaskirin, hinek girtî li erdê radizên û li qawîşên ji bo 28 kesan 40 girtî tên girtin. Di raporê de hat destnîşankirin ku li girtîgehê tenê makîneyeke cilşûştinê heye û destûr tê dayîn ku tenê zarokên neçarî sûc hatine kirin û girtiyên nexweş bi kar bînin. Di raporê de hat gotin ku ji ber îşkence û muameleya xerab a li girtîgehê tê kirin, di nava salekê de 16 caran li Navenda Ragihandinê ya Serokkomariyê (CÎMER) gilî hatine kirin û di çarçoveya lêpirsîna îdarî de biryara “hewcehî bi cezadayînê nîne” hatiye dayîn.

Di raporê de binpêkirinên li Girtîgeha Tîpa L a Maltepeyê wiha hatin rêzkirin:

“* Personelên peywirdar di mijarên mafên mirovan, têkiliyên bi şexsan re û qedexeya îşkence û miameleya xerab de nehatine perwerdekirin.

* Li beşa razanê ya qawîşekê de kêzik hatine dîtin û di asta tê xwestin de derman nayê reşandin.

* Daşira li odeya xesara raçînkan û pêşîlêgirtina travmayê, ji hêla kamerayan ve tê dîtin û kişandin.

* Li odeya xesara raçînkan û pêşîlêgirtina travmayê lembeya floresan a ku girtî bikare zirarê bide xwe heye.

* Girtî neçar dimînin cilên xwe yên şûştî li korîdoran raxin û ev yek jî dike ku qawîşên pir zêde qelebalix hewayî negirin.

* Ji bo girtiyên nexweş û astengdar qawîşeke cuda tune ye û li serşok û daşiran pêgirtek tune ye.”

Qawîşên ku ji bo girtiyên astengdar û nexweşan hatine veqetandin ne guncaw in

Di raporê de hat destnîşankirin ku li Girtîgeha Tîpa T a Afyonkarahîsarê jî heman binpêkirin tên jiyîn. Hat diyarkirin ku kapasîteya girtîgehê hezar û 212 kes e, lê hezar û 334 girtî tên ragirtin. Di berdewamê de hat destnîşankirin ku qawîşên ji bo girtiyên nexweş û astengdar hatine veqetandin ne guncaw in, hem daşir hem jî serşok ne li gorî girtiyên nexweş û astengdar in. 

Binpêkirinên li Girtîgeha Tîpa T a Afyonkarahîsarê wiha hatin rêzkirin:

“* Personelên peywirdar di mijarên mafên mirovan, têkiliyên bi şexsan re û qedexeya îşkence û miameleya xerab de nehatine perwerdekirin.

* Li girtîgehê makîneya ziwakirinê ya ku girtiyên jin bi kar bînin tune ye.

* Daşira li odeya xesara raçînkan û pêşîlêgirtina travmayê, ji hêla kamerayan ve tê dîtin û kişandin.

* Li odeyên lêgerînê pêşmalkên ku tenê yek carê bên bikaranîn tune ne û lêgerîn li gorî mewzûatê nayên kirin.

* Girtî demek dirêj li qawîşa demkî tên sekinandin.”