RONÎDA HACÎ

Hesekê – Piştî hilweşandina rejîma Baasê, bi hatina rêveberiya demkî ya Sûriyeyê û îlankirina destûrê re; komkûjî li peravên Sûriyeyê destpê kirin. Têkildarî mijarê endama têkilî û tifaqên siyaseta demokratîk a Kongra Star Rûken Ehmed ji ajansa me re nirxandin kir.

Rûken Ehmed da zanîn ku gel ji bo xwedî li maf û nasnameya xwe derdikeve û li dijî sîstema yekalî dest bi şoreşê kiriye û wiha anî ziman: “Piştî têkoşîn û berxwedana 54 salan a gelê Sûriyeyê Rejîma Baasê hat hilweşandin. Bi hilweşandina vê sîstemê gel kêfxweşiyek mezin jiya. Ji ber ku sîstema Baasê ji bo guhertin û veguhertinê vekirî nebû mafên pêkhateyan binpê dikir. Bi vê gavê hêviya gelan çêbû ku rûpelek nû li Sûriyeyê vebe û pêkhate bi rengekî demokratîk, dûrî Sûriyeya ne navendî bijîn. Bêguman dema ku şoreşê destpê kir, armanc ew bû ku Sûriyeya rengîn a ku mafên her kesê tê de heye were parastin.”

‘Bi hatina HTŞ’ê re Sûriye ber bi rewşeke metirsîdar û bi aloztir ve diçe’

Rûken Ehmed destnîşan kir ku HTŞ dixwaze şerekî navxweyî derxe û wiha got: “Hêviyên gel vala derketin  rewşeke metirsîdar û bi aloztir heye. Ji ber ku cîhadîstên hatine ser rêveberiyê, hem di lîsteyên terorê de ne, hem jî dîroka wan bi kuştin, revandin û talankirina mal û milkên gelên Sûriyeyê dagirtî ye. Ji ber wê rewşa Sûriyeyê her ku diçe xirabtir dibe.”

‘Pêwistiya gelên Sûriyeyê bi ewlehî û aramiyê heye'

Rûken Ehmed da zanîn ku HTŞ li dijî gelên Sûriyeyê sûcên şer dike û wiha got: “Hikûmeta nû biryar da ku her kes çekên di dest xwe de deyne ji bo ku Sûriye ber bi çareseriyeke siyasî ve biçe, lê em dibînin kê çeka xwe danî hatin qetilkirin. Gelên Sûriyeyê, ji avakirina Sûriyeya nû zêdetir pêwistiya wan bi ewlehî û aramiyê heye. Hikûmeta nû gavên lezgîn ên şeklî avêt, ev yek bû sedema komkujiyên ku îro li ser civaka Elewî çêdibin. Di vê pêvajoyê de pêwistiya me bi şopandin û çavdêriya neteweyî ya ji ber van sûcên şer heye. Divê ji hemû aliyên ku destên wan di sûcên şer de heye hesab were xwestin. Heya roja îro li Efrîn, Serêkaniyê, Girê Spî û peravên Sûriyeyê binpêkirin û sûcên şer tên kirin. Bi vê rewşê, Sûriye ber bi çareseriyê ve naçe.”

‘Destûr neyê guhertin wê rewş ber bi şoreşek nû ve biçe’

Rûken Ehmed tekez kir ku destûr neyê guhertin wê şoreşek nû dest pê bike û berdewam kir: “Ya ku mijarê bi aloztir dike destûra nû ye. Di vê qeyrana ku gel tê qirkirin dikeve xizmeta aliyekî bi tenê. Ev jî tehlûkeyek mezin li ser Sûriyeyê çêdike û ji aliyê pêkhate, jin û hemû gel ve nayê qebûlkirin. Em jî parastina mafên xwe tê de nabînin û me cihê xwe tê de negirt. Divê hikûmeta nû berê xwe bide daxwazên gel û şaşîtiyên Esed dubare neke. Tehemula gelên Sûriyeyê ji şer re nemaye her wiha ji zordariyek nû re jî nemaye.”

‘Divê nêrîna me yek be, ji ber ku çarenûsa me bi hev re girêdayî ye'

Rûken banga hevgirtin û yekitiya jinên Sûriyeyê kir û wiha axaftina xwe bi dawî kir: “Di vê pêvajoyê de hevgirtina jinên Sûriyeyê girîng e. Di şeran de yên ku her zoriyê kişandin û bedel dan jin bûn. Ji bo wê şêwazên parastinê, di hemû aliyan de rêxistinbûn, hevgirtin û lihevkirina jinên Sûriyeyê pêwist e. Di vê demê de pêwistiya me herî zêde bi hatina cem hev heye. Di vê nêrîna me yek be, ji ber ku çarenûsa me bi hev re girêdayî ye. Em nikarin li Bakur û Rojhilatê Sûriyeyê azad bijîn dema ku li peravên Sûriyeyê jin werin qetilkirin. Erk û misyonek mezin dikeve ser milên jinên Kurd û hemû jinên Bakur Rojhilatê Sûriyeyê. Ji ber ku tecrubeya me heye em parve bikin û biparêzin, bikin destkeftiyek ji hemû jinên Sûriyeyê re. Bi wê yekê em ê bikaribin rê li ber Sûriyeya cîhadîst û yekalî bigrin û ne tenê mafên jinan biparêzin, mêran jî ji wê cihoka hişmendiya nijadperest, cîhadîst û olperast xelas bikin.”