Hesekê - Piştî ku Meclisa Gelan a Demokratîk li ser qanûna hejmar 5 a 2024’an der barê hilbijartinên şaredariyan de di Hevpeymana Civakî de erê kir, komîsyona bilind a hilbijartinan li Bakur û Rojhilatê Sûriyeyê 30’yê Gulanê weke roja lidarxistina hilbijartinên şaredariyên demokratîk eşkere kir.

Li ser asta Bakur û Rojhilatê Sûriyeyê li gorî amarên Rêveberiya Xweser dê 3 milyon kesên temenê wan ji 18 mezintir ji bo hevşaredarên 121 şaredariyên li 7 kantonan 30’î Gulanê hilbijartin pêk werin.

Kongra Star û Partiya Yekitiya Demokratîk ku di 17’ê Nîsanê de bi daxuyaniyekê tifaqa xwe ragihandibûn, pêşhilbijartinên xwe ji bo namzedên jin berdewam dikin.

Îro jî li ser asta navçeya Til Temirê û her du bajarokên wê Xera û Qibûr Qerajina pêşhilbijartina namzedên jin ên hevşaredar ji bo avakirina şaredariyeke demokratîk, di demijmêr 09:00 sibehê dest pê kir û wê demijmêr 15:00 deriyên dengdanê werin girtin.

Jin berê xwe dan sindoqan

Namzedên jin ên ku xwe ji bo pêşhilbijartinên her du Şaredariyên Gel ên navçe û bajarokan bin hilbijartin ev in: Melsa Dêrikî, Nûra Ebdulkerîm, Sabrîn El-Ehmed, Xîtam Îbrahîm û Zeyneb Mihemed El-Ehmed.

Di saetên sibehê jinan berê xwe berê xwe dan sindoqên dengdanê yên ku li navendên Kongra Star li navçeyê û bajarokan hatine bicihkirin.

Piştî ku pêşhilbijartin biqedin û hejmartina dengan bi dawî bibe wê Kongra Star daxuyaniyekê jinên ku dê bibin namzedên şaredariyan eşkere bikin.