Navenda Nûçeyan – Meclîsa Jinan a Partiya Wekhevî û Demokrasiyê ya Gelan(Partiya DEM’ê) bal kişand ser pêşnûmeya Pakêta Dadwerî ya 12’emîn û got ku, “Pakêta dadwerî wekî rêbazek ji bo ji nû ve sêwirandina civakê bi kodên yekreng, zayendperest û serdestiya mêran tê bikaranîn.”

Di daxuyaniyê de hat diyarkirin ku Pakêta Dadwerî ya 12’emîn, mîna pêşnûmeyek ji raya giştî re hatiye pêşkêşkirin, ji rêziknameyek qanûnî bêtir e û wiha hat domandin: “Ew gavek di projeya hikûmetê de ye ku civakê li gorî xeta xwe ya îdeolojîk ji nû ve teşe bide û rêziknameyek civakî ya nû ava bike.”

‘Hikûmet hewl dide rojeva civakî biguherîne’

Daxuyaniyê bal kişand ser naveroka pakêtê û wiha got: “Di demekê ku xizanî, bêkarî, kuştinên jinan, îstismara zarokan, zarokên ku dibin hedefa çeteyên narkotîk û sûc, polîtîkayên bêcezatiyê û niheqî li welêt kûrtir dibin de; li şûna çareserkirina van pirsgirêkên avahîsaziyê, hikûmet hewl dide ku bi rêziknameyên ku mafên jin, zarok û kesên LGBTQ+ hedef digirin, rojeva civakî biguherîne. Pakêtên dadwerî wekî rêbazek ji bo ji nû ve dizaynkirina civakê bi qanûnên yekreng, zayendperest û serdestiya mêran têne bikaranîn. Agahiyên ku ji pêşnûmeya Pakêta Dadwerî ya 12’an derketine holê, nîşanek eşkere ya vê yekê ye.”

‘Êrîşek eşkere ya li dijî destkeftiyên jinan’

Meclîsa Jinan ragihand ku armanckirina mafê jinan a "alîkariyê" yê bi zehmetî bi dest xistine, wek paşguhkirina xizanî, bêkarî û îstismara ku jin pê re rû bi rû dimînin û mehkûmkirina wan bi jiyaneke tundiyê ye û wiha pê de çû: “Nafakaya xîzaniyê, ne mekanîzmayek e ku mêran dike qurbanî, lê belê armanc dike ku newekheviya kûr a ku jin pê re rû bi rû dimînin, çareser bike. Pêşkêşkirina vî mafî wekî "dewlemendkirina niheq" a dijminatiyê ye. Bi rastî, bi hezaran jinên berdayî pir caran nikarin alîkariya xwe bistînin û em ê li hember desteserkirina vî mafî bêdeng nemînin. Wekî ku di qanûnan de hatiye diyarkirin, mafê alîkariyê ne mafekî bêdawî ye; şert û mercên ku alîkarî tê de diqede di qanûnê de bi zelalî hatine destnîşankirin. Bi nîşandana vî mafî wekî mecbûriyetek bi tevahî bêdawî, manîpulekirina têgihîştinê êrîşek eşkere li dijî destkeftiyên jinan e.

Tawanên nefretê têne teşwîqkirin

Rêziknameyên derbarê pêvajoyên veguherîna zayendî de ku di pêşnûmeyê de cih digirin, berhema têgihîştinek in ku nasnameyên zayendî yên cûda paşguh dike, hedef digire û armanc dike ku ceza bike. Ev nêzîkatî sûcên nefretê teşwîq dike û mafê kesekî yê kontrolkirin û biryardana li ser laşê xwe ji dest dide. Gihîştina lênihêrîna tenduristiyê mafek bingehîn ê mirovan e û sînordarkirina vî mafî ya ji ber sedemên siyasî an îdeolojîk, nayê qebûlkirin. Em ê nehêlin ku maf û destkeftiyên me bibin mijara danûstandinan. Em ê bi biryardarî mafê jiyanê, hemwelatîbûna wekhev û azadiyên jin, zarok û kesên LGBTQ+ biparêzin.

Civakek demokratîk, wekhev, azad û piralî tenê bi berfirehkirina mafan dikare were avakirin, ne bi desteserkirina wan. Ji ber vê yekê, em ê têkoşîna li dijî binpêkirinên mafan ên ku di bin navê Pakêta Dadwerî ya 12’an de têne ferzkirin dijwartir bikin; em ê bi biryardarî jiyana xwe ya hevpar û civaka xwe ya demokratîk bi hev re bi cudahiyên xwe biparêzin.”