Hesekê – Mala Jin a li Bakur û Rojhilatê Sûriyeyê li 7 kantonan bi 30 navendan xwe birêxistin kiriye û yekemîn saziya ku bi Şoreşa 19’ê Tirmehê re hatiye avakirin e bi dirûşma “Bi mîsogeriya şoreşa jin a azad em ê malbata demokratîk pêş bixin” 2’yemîn konferansa xwe li Hesekê li dar xist. 300 delegeyên ji Kongra Star, Komîteyên Lihevhatinê, endam û rêveberên Mala Jin, Meclîsa Edaletê, Kombûna Jinan a Zenûbiya û Meclisa Sûriya Demokratîk di konferansê de amade bûn.

‘Jinên Kurd, Ereb, Suryan û Ermen bi yekîtiyê pêşengiya şoreşê dikin’

Konferans bi deqeyek rêzgirtin dest pê kir, paşê Berdevka Kongra Star a Rojava Rîhan Loqo lidarxistina 2’yemîn Konferansa Mala Jin l tevahî jinan pîroz kir û wiha got: “Em bi vê munasebetê hemû şehîdên jin bibîr tînin. Rêber Ocalan ronahî da tarîtiya ku jin tê de jiyan dikir û îradeyek azad di kesayetek jinan da ava kir. Yek ji nirxên herî pîroz yên şoreşa jin û bi têkoşîna 40 salan a jinên Kurd Mala Jin hat avakirin. Ji bo avakirina edaletek civakî û malbatek demokratîk û wekhev Mala Jin hatin avakirin. Jin bi hêzek mezin û îradeyek mezin û li ser paradîgmaya Netewa Demokratîk xwe birêxistin kir, di kesayeta jina azad de malbatek demokratîk tê avakirin, bi malbata demokratîk civakek demokratîk û azad ava dibe. Dewletên desthilatdar bi hişmendiya baviksalarî siyasetek dan meşandin da ku jinan dûrî berxwedan û rêxistinbûyînê bibin. Lê jin li hemberî vê siyasatê bi têkoşînek mezin kar û xebatên xwe dimeşîne. Jinên Kurd, Ereb, Suryan û Ermen bi yekîtî û rêxistina jinan pêşengtiya şoreşê dikin.”

‘Şerekî mezin li hemberî felsefeya Jin Jiyan Azadî tê meşanidn’

Rîhan Loqo balkişand li ser Fermana 74’an a di 3’ê Tebaxa 2014’an de li ser civaka Êzidî ya li Şengalê pêk hat û wiha got: “9 sal li ser komkujiya gelê Êzidî derbas dibe, di şevek tarî de êrîşek mezin li ser civaka Êzidî pêk hat û çeteyên DAIŞ’ê gelek jin, zarok qetil kir û revandin. Hemû cureyên şidetê li ser wan jinan û zarokan hatin pêkanîn.” Rihan Loqo ya îşaret bi têkoşîna jinan a cîhanî kir wiha domand: “Jinan li hemberî sîstema desthilatdar serî hildan û banga azadiyê kirin. Îro şerekî mezin li hemberî felsefeya Jin Jiyan Azadî tê meşandin. Erka me di vê demê de ew e ku em rê nedin hişmendiya baviksalarî ku me kole bikin û civaka me ji hev bixin. Erka me avakirina civakek azad û wekhev e. Pêwist e em bi biryarên ku rê li hemberî qetilkirina jinan û hişmendiya baviksalarî bigrin.”

Piştî ku dîwanê konferansê ji 5 endaman hat avakirin mamosteya zimanê kurdî Hena Xalid perspektîfên Rêber Abdullah Ocalan ên têkildarî jinan û edaleta demokratîk xwendin.

Dûre Hena rapora 7 salan a kar û xebatên Mala Jinan a Bakur û Rojhilatê Sûriyeyê ya ku komîteya amadekar amade kiriye, xwend.

Li gorî raporê, di 7 salan de, malên jinan sedana 79 hezar û 33 mal li gund û komînên navçeyên herêmê kirine da ku qanûnên malbatê ji wan re şîrove kirin. Giliyên ku hatin cem malên jinan 46 hezar û 710 bûn. Ji wan 27 hezar û 727 doz hatin çareserkirin. 6 hezar û 709 doz jî hina di nirxandinê de ne. Her wiha ji wan 9 hezar û 971 doz veguhastine Dîwana Edaleta Civakî û hezar û 765 doz veguhastine saziyên din.

Malên jinan 641 jinên ciwan radestî malbatên wan kirin piştî ku ew li hev anîn.

Konferans li pêşiya dezgehên çapemeniyê girtî berdewam kir. Li gor komîteya amadekar, encamnameya konferansê dê bi daxuyaniyekê sibe bê eşkerekirin.