Navenda Nûçeyan – Serhildanên ku piştî qetilkirina Jîna Emînî ya ku li Tahranê piştî eşkenceya ji aliyê “polîsên exlaqî” ve dît jiyana xwe ji dest da, li Rojhilatê Kurdistanê û Îranê destpêkirin, hewil tê dayîn bi her curê êriş û zordestiyê bê tepisandin.

Yek ji êrîşên herî hovane ku leşker û polîsên Îranê ji bo tepeserkirina serhildanên gel ku 4 meh in didomîne pêk anî, di 30’ê Îlona 2022’an de li Zahîdan a navenda parêzgeha Sîstan û Belûcistanê pêkhatibû. Ji ber komkujiya ku weke 'Îna bixwîn' tê binavkirin, her roja Înê li gelek bajarên eyaletê çalakî tên lidarxistin.

Ciwanan gel vexwend kolanan

Li Belûcîstanê ku ciwan ji bo çalakiyên girseyî gel vexwend kolanan, îro jî tê payîn li navenda bajêr dê çalakî bên lidarxistin.

Ciwanên Sîstan û Belûcîstanê ku duh daxuyaniyek weşandin, wiha gotin, "Her çiqas rejîma dîktator a Îranê hewl bide gel û daxwazên wan bifetisîne, em ê ji bo şermezarkirina sûcên hikûmetê li kolanan bin.” Di bangewaziyê de hat xwesntin ku hemû gelê Sîstan û Belûcîstanê piştî nimêja înê li kolanan kom bibin.

Di êrîşê de çavê xwe winda kiribû…

Di êrîşên polîsan ên heta niha li Sîstan û Belûcîstanê pêk hatin de bi dehan kes jiyana xwe ji dest dan û birîndar bûn, gel di bin gefa girtin, binçavkirin û eşkenceyê de ye. Xwendekara hiqûqî ya Îranê Ghazal Ranjkesh ku li bajarê Bandar Ebasê dijî, di 23’ê Mijdara 2022’an de dema ji malê ber bi karê xwe vê diçû, ji ber gulebarana hêzên polîs ên rejîmê çavê xwe yê rastê winda kiribû. Ghazal Ranjkesh piştî ku çavê xwe winda kir wêneyê xwe kişand û bi nota "Ev wêne ji bo bîranîna mayîna çavê min ê rastê hatiye tomarkirin" bi şopînerên xwe re parve kir. Ghazal Ranjkesh piştî emeliyeta derbas kir çavê protez bikaranî.

Girtî Sahar Shahnazî nayê dermankirin

Her wiha hat parvekirin ku çalakvan Sahar Sahahnazî ya li Girtîgeha Evînê girtî ye, piştî greva birçîbûnê rewşa tenduristiya wê ne baş e û nayê dermankirin. Hat hînbûn ku Sahar Sahahnazî bêhelî, werimîna rû û pirsgirêkên tenduristiyê yên bi vî rengî dijî û bi awayekî lez û bez zeîf dibe. Rêxistinên mafên mirovan ragihandin ku çalakvan dema greva birçîbûnê û piştî wê rastî gelek bêhiqûqiyan hatine. Bi tu awayî destûr nayê dayîn ku Sahar Shahnazî bi malbata xwe re têkilî deyne, di nava agahiyan de cih digre ku nikare zaroka jî xwe bibîne.