Qamişlo –Piştî biryara 27’ê Tebaxê ya sînorkirina Zimanê Kurdî, dengê nerazîbûnê li dijî vê biryarê her ku diçe bilindtir dibe. Bi berdewamkirina çalakî û nerazîbûnan, mamoste, xwendekar û saziyên civakî mafê gelê Kurd ji bo fêrbûn û perwerdehiya bi zimanê dayîkê diparêzin.

‘Ev biryar maf û dengê xwendekaran naparêze’

Li bajarê Qamişloya Rojavayê Kurdistanê, xwendekar û malbatên wan ji bo parastina mafê xwendin û fêrbûna bi Zimanê Kurdî û li dijî biryara sînordarkirina wî, kona çalakiyan vekirin. Ev kon li pêşiya avahiya Neteweyên Yekbûyî hat vekirin û dê du rojan berdewam bike.

Têkildarî vê çalakiyê, xwendekar Silava Elî axivî û diyar kir ku ew wekî xwendekarên Kurd li dijî biryara sînorkirina Zimanê Kurdî ne û vê biryarê bi tevahî red dikin. Silava Elî got ku ev biryar maf û dengê xwendekaran naparêze û wiha pê de çû: “Em ne li dijî fêrbûna zimanên biyanî ne, lê em li dijî kêmkirina mafê xwe yê zimanî ne. Ji ber ku ziman deng, reng û nasnameya çanda me ye, lê mixabin dengê me tê paşguhkirin.”