Navenda Nûçeyan – Ji bo aktîvîsta kurd Werîşe Mûradî ku ji aliyê hêzên Îranê ve hate revandin li pêşiya Konsolosxaneya Îranê ya li Osloyê ji aliyê Partiya Jiyana Azad a Kurdistanê (PJAK) û Komîteya Civaka Jinên Azad a Rojhilatê Kurdistanê (KJAR) ve çalakî hate lidarxistin. Di çalakiyê de tevî pankarta bi nivîsa ‘Jin, Jiyan, Azadî’, posterên Zeynep Celaliyan û Werîşe Mûradî yên dîlgirtî hatin hildan.

Aqûbeta wê nayê zanîn

Komîteya Norwêcê ya KJAR'ê di çalakiyê de daxuyaniyek da û diyarkir ku hêzên dewleta Îranê aktîvîst Werîşe Mûradî di meha Tîrmehê de revand û hîn jî aqûbeta wê nayê zanîn û wiha hate gotin: “Endama KJAR'ê Werîşe Mûradî bi nasnav Ciwana Sine ku li Rojhilatê Kurdistanê karê me yê rêxistina siyasî dimeşîne, li nêzî Sine hate revandin û agahî jê nayê wergirtin. Malbata wê piştî revandina Werîşe Mûradî kete nava hemû hewldanan, lê belê hîn jî agahî bi dest nexistiye, bi aqûbeta wê nizane. Vê yekê fikarên malbatê û rêxistina me zêde kiriye."

‘Divê tavilê bê berdan’

Nûnerê Ewropayê yê Tevgera Azad Omer Amîn jî ragihand ku Werîşe Mûradî ji aliyê îstîxbarata Îranê û sîxurên Muxafizên Şoreşê ve hatiye revandin û got, "Komara Îslamî ya Îranê ji jiyana vê hevala me ya şoreşger berpirsyar e. Divê tavilê bê berdan."

Çalakî bi dirûşma ‘Jin, Jiyan, Azadî’ bi dawî bû.