Şengal – Li bajaroka Xanesorê ya Şengalê Yekitiya Ciwanên Êzidîxanê û Yekitiya Jinên Ciwan ên Şengalê pirtûkxaneya Şehîd Vejin vekirin. Di vekirina pirtûkxaneyê de bi dehan ciwanên Êzidî û Ereb li gel endamên sazî û rêxistinên Şengalê amade bûn. Pirtûkxane li ser destê dayika Hevserokê Desteya Rêveber a Şengalê Şehîd Merwan Bedel ve hate vekirin.

Beriya vekirinê li ser navê ciwanên Êzidîxanê Berekat Şengalî axaftinê kir û da zanîn ev cara yekemîn e li Şengalê ji bo pêşxistina zanebûna ciwan û tevahiya civakê pirtûkxaneyek tê vekirin û wiha berdewam kir: “Me weke ciwanên Êzidî di çarçoveya rêxistinkirina ciwanan de ev xebat pêşxist da ku ciwanên me karibin bêtir xwe zane bikin û dîroka xwe nas bikin.”

 ‘Ji bo em xwe biparêzin pêwîst e em xwe zana bikin’

Berekat Şengalî destnîşan kir ku ji bo ew karibin rê li ber fermanan bigirin û xwe ji fermanên nû biparêzin pêwîste xwe zane bikin û got: “Eger em xwedî zanebûn bûna ewqas ferman bi ser me de nedihat. Li Şengalê niha di aliyê xwe rêxistinkirinê de gelek pêşketin çêbûne û gelê me êdî dikare xwe biparêze û birêve bibe. Pêwîst e em ji bîr nekin ku ev pêşketin bi keda hevalên me yên şehîd çêbûye, li ser me erke em gotinên şehîdên xwe ji bîr nekin û li ser xeta wan bimeşin. Şehîd Vejîn ku di ber ciwanên Şengalê de gelek ked daye digot ‘Ji bo civak karibe xwe biparêze û li ser pêyê xwe bisekine pêwîst e xwe zane bike.’ Ev pirtûkxane li ser vî esasî û ji bo ku em xeyalên şehîdên xwe pêk bînin hatiye vekirin.”

Merwan Bedel, Xoxê Cindî jî vekirina pirtûkxaneyê li şehîdên 74 fermanan, li tevahiya şehîdên tekoşîna azadiyê û li Abdullah Ocalan pîroz kir.

Piştî ku pirtûkxane hate vekirin şêrinahî li ser mêvanan hate belavkirin.

Di pirtûkxaneya Şehîd Vejîn pirtûkên Rêberê Gelê Kurd Abdullah Ocalan, pirtûkên derbarê dîroka Êzidiyan de, pirtûkên çandî-civakî, siyasî û yên Abdullah  Ocalan jî di nav de hejmarek pirtûk cih digire. Ciwan dikarin li navenda pirtûkxaneyê pirtûkan bixwînin yan jî bibin malê bi şertê ku ew pirtûk carekî din li navendê bê vegerandin.