BIHARAN LEHIB

Kabîl- Jin ji bo mafên xwe yên li dijî Talîbana ku ji 15’ê Tebaxê û vir rêveberiya Afganistanê bi dest xist û di rêveberiya welat de di qanûnên jinan de gelek guherîn pêk anîn berxwedana xwe didomînin. Ji rakirina Wezareta Jinan, heta derxistina jinan ji çalakiyên werzîşê, qedexekirina muzîk û wênesaziyê, cihê ku jin xwe îfade bikin her kêliyê de teng dibe. Jin bi kampanya û çalakiyên ku li welatên xwe organîze dikin hewl riya bêhngirtinê ji xwe re bibînin.

Aktîvîsta Afganî Nesîme Resa der barê kampanya û çalakiyên ku jin van rojan li Kabîlê dimeşînin de axivî. Nesimeh Resa bi gotinên; "Piştî ku Afganistan ket destên Talîbanê, ji bo gelek jinan pencereyek din vebû" diyar dike ku wan ji Afganistanê heta derveyî welat dest bi kampanyayan kirine. Nesîme Resa got; "Ji bo di çalakî û bûyeran de hêza jinan eşkere bibe, me dirûşm avêtin û ev dirûşm ev bûn; ‘Jin dikarin bibin bijîşk, rojnamevan, endezyar, hunermend, werzîşvan, jin dikarin welatê xwe bi rê ve bibin, beşdarî xebatên ji bo rêveberiya welatê xwe bibin’ û me got bêyî jin, civakek tu carî bi pêş ve naçe” û diyar kir ku îfadekirina van tiştan dê bidome.

“Em ê ji sedî sed bi ser bikevin”

Aktîvîst Nesîme Resa diyar dike ku ew bi çalakî, bûyer û kampanyayên ku dikin bi dirûşma "Em ê ji sedî sed bi ser bikevin" bi pêş ve diçin û diyar dike ku ev şerê azadiya jinan e û wiha dibejê; "Ger em şer bikin û têkoşînê bidin meşandin, em ê teqez bi ser bikevin.”

"Pêwîst e jin derkevin derve" 

Yek ji aktîvîstên civaka sivîl, Reyhaneh Talaş, destnîşan kir ku piştî Talîbanê rêveberiya welat desteser kir, jin neçar in bi rengekî aktîf derkevin kolanan û wiha axivî: "Armanca me ew e ku dengê jinên Afganî were bihîstin, bilind bibe û ji her devera cîhanê were bihîstin."

Reyhaneh Talaş dibêje ku nayê qebûlkirin di rêveberiya welat de cih nedin jinan û wihagot; "Me dizanibû gava ku Talîbanê, hukûmeta hat avakirin ragihand û îlan kir, di kabîneyê de cih ji jinan re tune ye û got ku ew tu mafan nadin jinan û dema ku gotin di nava polên dibistanê de refên jin û mêran bi perdeyan dê werin veqetandin û ji jinên karker re bêjin biçin malên xwe, diyar bû ku ji bo me rojên tarî tên. Pêwîst e beriya rojên me hemû tarî bibin em dengê xwe derbixin û divê em heqareta ku li me hatiye kirin qebûl nekin.”

"Em dev jê bernadin, heya serkeftinê em ê berdewam bikin" 

Reyhaneh Talaş dibêje ku dirûşma wan a sereke ya kampanyayê rewşa jinên Afganî wiha vedibejê; "Ez bêkar im, nanê min tune ye" û wiha axivî; "Ev ne tenê êş û belengaziya jinan, di heman demê de êş û belengaziya civakê jî eşkere dike. Tevî ku Talîbanê gotiye ew ê hikûmetê hamû aliyan digre ava bike jî mixabin, ya ku em di pratîkê de dibînin eşkere ye û em ê teqez dev ji têkoşîna xwe bernedin, heya ku bi ser bikevin em ê berdewam bikin.”