Amed – Komeleya Rojnamegerên Jin a Mezopotamyayê (MKG) di serî de Amed, Stanbol, Mêrdîn, Riha û Şirnexê têkildarî binçavkirina rojnamegeran a li gelek bajaran daxuyanî da.

Di daxuyaniyê de bal Lê hat kişandin ku serdegirtina malan rojek piştî 25’ê Mijdarê ya Roja Têkoşîna Li Dijî Tundiya Li Ser Jinê hatiye kirin û hat gotin ku ev parçeyek ji êrişa bi pergalî ya li hemberî têkoşîna azadiyê ya jinan e.

Di daxuyaniyê de wiha hat gotin:

"Piştî 25'ê Mijdarê Roja Têkoşîna Navneteweyî ya li Dijî Tundiya li Hemberî Jinê, di çarçoveya lêpirsîna Eskîşehîrê de, îro danê sibê li Amed, Stenbol, Mêrdîn, Şirnex û Rihayê, polîsan di nav de malên rojnamegeran jî heyî bi ser gelek malan de girt. Seroka Komeleya Rojnamegerên Jin a Mezopotamyayê (MKG) Roza Metîna jî di nav de gelek rojnameger hatin binçavkirin. Her wiha polîsan bi ser mala rojnameger Gulcan Derelî de jî girt.

Rojnamegerên jin dibin hedef

Ev rastiyeke ku azadiya çapemenî û ragihandinê mafekî makeqanûnî ye û kevirê bingehîn ê civakên demokratîk pêk tîne. Lê ev bûyerên ku îro em dibin şahid, nîşaneya zexta sîstematîk a li ser xebatkarên çapemeniyê ye. Nayê qebûlkirin ku di serî de rojnamegerên jin ji bo eşkerekirina heqîqetê bibin hedef.

Ev mudaxaleya der hiqûqî ya li hemberî hemû rojnamegerên jin, ne tenê li hemberî pîşeya rojnamegeriyê, di heman demê de li hemberî mafê xwe gihandina nûçeyên rast êrişek e.

Banga piştevaniyê

Em weke Komeleya Rojnamegerên Jin ên Mezopotamyayê careke din tekez dikin ku em ê tu carî tawîzê ji îradeya xwe ya berdewamkirina erka xwe ya dengê gel û parastina mafên rojnamegerên jin nadin. Zext, binçavkirin û polîtîkayên tirsandinê wê nebin sedem ku em dest ji têkoşîna heqîqetê berdin.

Di vê çarçoveyê de em daxwaz dikin ku demildest hevalên me yên dij hiqûqî hatine binçavkirin serbest bên berdan. Em bang li berpirsyaran dikin ku dawî li van pêkanînên ku azadiya çapemeniyê binpê dikin, bînin. Em hemû kes û saziyên ku mafê gel ê agahdarkirinê diparêzin vedixwînin hevgirtinê."