Navenda Nûçeyan – Hêzên Ked Aştî û Demokrasiyê li dijî tayînkirina qeyûm a li Şaredariya Colemêrgê ku Partiya Wekhevî û Demokrasiyê ya Gelan (DEM Partî) di hilbijartinên herêmî de bi destxist, bi dirûşma "Em ji bo ked û azadiya xwe rê nadin qeyûman" li Qada Kartal a Stenbolê mîtîngê li dar dixe. Di mîtîngê de nameyên girtiyan hat xwendin.  

'Em ê di rojên azad de bicivîn'

Peyama Hevşaredarê Colemêrgê yê ku li şûna wî qeyûm hatî tayînkirin Mehmet Siddik Akiş wiha ye: "Tu carî xem û fikarên me çênebûn û me hewlda ku ku berdêla wê çi dibe bila bibe soza ku me dane gelê xwe li erdê nehêlin. Ev soza aştî, biratî û azadiyê bû ku me li salona dadgehê anî ziman. Ez dixwazim bibêjim ku îro em ne poşman in. Helwesta bi heybet a partiya me, gelê me û we hêzên bi rûmet ên Ked, Aştî û Demokrasiyê ku di vê heyamê de li dijî rejîma qeyûm heye, ji dil û can pîroz dikim. Ez hêzên Ked, Aştî û Demokrasiyê yên Stenbolê ku îro li dijî darbeya li dijî îradeya gel hatin cem hev û hemû gelê me, çi li qadan bin, çi ne li qadan bin, bi baweriya xwe ya ku em ê di rojên azad de bên cem hev, bi hezkirin û rêz silav dikim."

'Li dijî desteserkirinê têkoşîn'

Hevseroka Giştî ya HDP'ê ya berê Fîgen Yuksekdag, ev peyam da: "Îradeya gel nayê girtin. Em û ev gel, li meclîsê, li salonên dadgehê, li girtîgehan û kolanan nehiştin vîn bê binpêkirin. Em ê ji niha û pê ve nadin binpêkirin. Di doza Kobanê de û li Wanê ceribandin lê bi ser neketin. Li Colemêrgê jî bi ser nakevin. Em weke girtiyên ji Doza Kobanê bang li gelê xwe dikin ku li dijî desteserkirina vînê têbikoşin.”

'Em ê bi hev re bi ser kevin'

Can Atalay ê ku di Doza Geziyê de hatibû girtin ji mîtîngê re ev peam şand: "Yên ku li Kartalê ji bo parastina keda xwe, îradeya xwe, pêşeroja xwe û welatê xwe li hev civiyan... Yên mil bi mil li ber xwe didin... Bizanin ku hêvî di we de ye, mil bi mil di têkoşîna we de ye. Em ê bi hev re şer bikin û em ê bi hev re bi ser bikevin. Silav ji kesên ku li Kartalê hêviyê mezin dikin. Silav ji siberoja hevpar a cîhanê û Tirkiyeyê re."

'Kolan û qad dê azad bibin'

Kesên du di 1'ê Gulanê de hatin girtin jî pêyam ji mîtîngê re şandin û gotin: "Di 1’ê Gulanê de bi hezaran polîs Stenbolê dorpêk kir û ev yek nîşaneya tirsa hikûmetê ya ji hêz û hêrsa karkeran û potansiyela serhildanê ye. Hikûmet bi medyaya xwe ya alîgir me wek hedef nîşan da, ev yek jî ji tirsan bû. Xwepêşandan û derketina kolanan sûc dihesibînin. Yekane armanca kesên ku têkoşîna nan û azadiyê weke çalakiyeke ne rewa nîşan didin, êrişkirina nan û azadiya me ye. Lê her tişt pûç e, em bên girtin dengê me li vê meydanê bi dengê we re tevdigere. Em ê ji zindanan, mal, kolanan, kargeh, zanîngehan bi hêztir, werin. Em ê kolan û qadan azad bikin.”