RAPERÎN BEKIR

Şehba – Artêşa Îraqê ji 20 Gulanê de hewl dide derdorê wargeha Mexmûrê penaberan Şehîd Rustem Cudî (Mexmûr) a ku 4 sal in di bin rêgirî û ambargoya PDK’ê de ye bi têlan û kuleyan dorpêç bike. Jinên Efrînî yên piştî ji aliyê dewleta Tirk ve dagirkirina Efrînê neçar man koç bikin û bi mehan e di bin ambargo û rêgiriya hikûmeta Şamê de ne, li dijî helwesta Irawê ya dorpêçkirina wargeha Mexmûrê helwesta xwe anîn ziman û gotin, “Mexmûr ne bi tenê ye.”

 ‘Armanca dewletan têkbirina vîna gelan e’

Hîdayet Elî a ku ji Koçbera Efrînê li kampên kantona Şehba li Bakûr û Rojhilatî Sûriyê dijî got ku êrişên li ser wargeha Mexmûrê li dijî dijî vîna gelan e û bi van gotina nerazîbûna xwe anî ser ziman:

“Hêzên desthilatdar dixwazin gelan ji herêmên wan koçber bikin û penaber bikin û piştre bi hemû rêbazan şerê wan bike. Ev dorpêça hikumeta Îraqê jî mînaka wê ye. Li gel kiryarên hikumeta Şamê û siyasetên xeniqandina koçberên Efrînê li Şehbayê, armanca dewletan yek e ku vîna gelan û projeya Netewa Demokratîk têk bibe. Gelê Mexmûr ewqas sal in li ser bingeha projeya Netewa Demokratîk di kampê de dijîn, lewra siyasetên dewletên kapîtalîst desthilatdar razî nabin ku herêmên berxwedêr û li ser bingeha dadwerî, wekhevî û demokratiyê xwe birêxistinkirî armanc digire. Em ne şerxwaz û xwînrêj in armanca me jiyaneke aştiyane wekhev e, dema em tên armancgirtin wê demê mafê me ye ku parastina xwe û rûmeta xwe bikin.”

‘Berxwedana gelê Mexmûrê berxwedana me ye’

Roşîn Xelîl a ji xelkê Efrînê ye dorpêça hikumeta Iraqê ya li ser wargeha Mexmûrê ferz dike şermezarkir û wiha got: “Êşên koçberên Efrînê û Mexmûrê yek e. Ji 5 salan ve em di kampên penaberiyê de dijîn hemû êş û zehmetiyên hikumeta Şamê û dagirkeriya Tirkiyê bi me dikin em dikişînin. Lewma em bi êşên gelê Mexmûrê dihesin û kiryarên hikûmeta Iraqê dijî wan em napejirînin. Berxwedaniya gelê Mexmûrê berxwedaniya me ye, bi yek rihê em ê kiryarên li dijî me dikin berxwe bidin, di pêkanîna azadî û dadweriyê de hemû zehmetiyên jiyanî derbas bikin da ku em bighêjin armanca xwe.”

‘Dive hikumeta Iraqê raweste’

Zozan Hebeş jî siyaseta hikûmeta Iraqê ya li hemberî xelkê Mexmûrê şermezar kir û got: “Ger hikumeta Îraqê dorpêça xwe li ser kampa Mexmûrê berdewam bike gel dê karaseteke mirovî mezin jiyan bikin, lewra divê destwerdaneke navnetewî hebe û hikûmetê raweste.”

‘Gelê Mexmûrê ne bi tenê ye’

Heyat Hesen jî nêrînê xwe anî ser ziman got: “Dorpêça kampa Mexmûrê a ji aliyê hikumeta Iraqê ve karekî ne mirovî ye û dorpêç li ser hemû gelê Kurd e. Mexmûr û xelkê xwe ne bi tenê ne hemû gelên azadîxwaz li pişt wan in, bi vê siyasetê hikumet nikare hebûna gelê Kurd têk bibe ji ber ku vîna gelê Kurd ji hemû planên wan bihêztir e.”