Navenda Nûçeyan – Di 29’ê Cotmeha 2022’yan di çarçoveya lêpirsîna Serdozgeriya Komarê ya Enqereyê de, nuçegihanên ajansa JINNEWS’ê Habîbe Eren û Oznûr Deger nûçegihanên Ajansa Mezopotamyayê (MA) Dîren Yurtsever, Bêrîvan Altan, Selman Guzelyuz, Hakan Yalçin, Emrûllah Acar, Ceylan Şahînlî, Zemo Aggoz û Denîz Nazlim, stajyarê MA’yê yê berê Mehmet Gunhan hatibûn binçavkirin û di 16’ê Gulana 2023’yan de jî hatibûn berdan.

Danişîna doza rojnamegeran ku bi îdiaya “endamtiya rêxistinê” tên darizandin, li 4’emîn Dadgeha Cezayên Giran a Enqereyê hat dîtin. Rojnameger Selman Guzelyuz û Denîz Nazlim ku serbest tên darizandin û parêzerên wan tevli danişînê bûn. Rêveberên Komeleya Mafên Mirovan (ÎHD) û Komeleya Hiqûqnasên ji bo Azadiyê (OHD) danişîn şopandin.

‘Dozger xwest rojnameger werin cezakirin’

Dozgeriyê di danişînê de mutalaaya xwe pêşkeş kir. Di mutalaayê de îfaeyên şahidê nepen “K8” û şahid Kerem Gokalp esas hatin girtin û hat xwestin ku rojnameger bên cezakirin. Her wiha di mutalaayê de hat îdiakirin ku hevpeyvînên rojnamegeran bi nûnerên HDP û DEM Partiyê re kirin li ser “talîmatê” hatine kirin. Dozger, diyar kir ku MA û JINNEWS bi riyên legal hatine avakirin û îdia kir ku “moral û motîvasyona endamên rêxistinê xweş dike.” Balkêş e ku îdiaya şahid Ozgur Baran ku ji bo rojnameger Oznur Deger digot “Xebatkara MA’yê ye” jî di îdianameyê de cih girt.

Parêzer û rojnamegeran jî li dijî mutalaayê dem xwestin. Parêzer Resûl Tamûr wiha got: “Divê mutalaaya dozger fesîh be û bê fêmkirin. Divê di navbera delîl û bersûcan de eleqe hebe. Nexwe Dadgeha Bilind vê rewşê weke binpêkirina mafê parastinê qebûl dike. Tu eleqeya îdiayan û rojnamegeran bi hev re nîn e. Em dixwazin biryara kontrola edlî ya li ser rojnamegeran bê betalkirin û ji dozgeriyê were xwestin ku têkiliya di navbera îdia û muwekîlan de eşkere bike.”

Şandeya dadgehê jî biryar da ku sepana avêtina îmzeyan a rojnamegeran were rakirin lê qedexeya derketina derveyî welat domand.

Danişîna dozê taloqî 3’yê tîrmehê hate kirin.