Navenda Nûçeyan – Bi boneya 10`ê Kanûnê Roja Mafê Mirovan a Cîhanê, Însiyatîfa Azadiya Abdullah Ocalan a Sûriyeyê û Însiyatîfa Parêzerên Sûriyeyê ya Parastina Abdullah Ocalan, ji bo rewşa sîstema îşkence û qirkirinê ya li Îmraliyê û ferzkirina “cezayên disîplînê” yên li dijî Rêberê Gelê Kurd Abdullah Ocalan nameyek bi zimanên kurdî, erebî û îngilîzî ji sekreterê giştî yê Neteweyên Yekbûyî (NY) Antonio Guterres re şand.

Name bi rêya şandeyeke ku ji endama Rêveberiya Însiyatîfa Azadiya Rêber Abdullah Ocalan a Sûriyeyê Nûha Umer, endamê Însiyatîfa Azadiya Rêber Abdullah Ocalana a Sûriyeyê Silêman Ehmed, Endama Însiyatîfa Parêzerên Sûriyeyê ya Parastina Rêber Abdullah Ocalan Aynûr Paşa û hevserokê Însiyatîfa Parêzerên Sûriyeyê ya Parastina Rêber Abdullah Ocalan Mihemed Emîn Niêmî pêk tê, radestî Komîseriya Bilind a Kar û Barên Penaberan a NY`yê ya li bajarê Qamişloyê hat kirin.

Di nameye de behsa tecrîdê hate kirin û bal kişand ser ‘mafê hêviyê’ û bang li Antonio Guterres kir ku ji bo azadiya fîzîkî ya Rêberê Gelê Kurd Abdullah Ocalan tavilê bikeve tevgerê. Di nameye de hate diyarkirin ku wê kampanya di kanûna 2023’an de ji bo azadiya fîzîkî ya Abdullah Ocalan hatî destpêkirin bidome.