NÛR SİRÎB

Yemen - Di meha Sibata bûrî de İntîsar El-Hemadî di gel hevalên xwe Yasimîn û Yusra El-Muqedem, li kolanek ê bajarê Sana yê hatin girtin û ji bo lêpirsînê bi bê zagonî ew birin girtîgehek nediyar.

Parêzerê İntîsar El-Hemadî, Xalid El-Kemal, ji ajansa me re axivî û wiha got: "Ji ber ku min doza İntîsar El-Hemadî dişopand rastî gefan hatim û min ev yek ji Komeleya Parêzera re ragihand."

Der barê îdiayên li ser İntîsar El-Hemadî didin nîşandan de jî, parêzer Xalid wiha got: "Ti sucê miwekîla min tune ye, ew jinek ciwan û bêgunehe, li kolanê bi bê hiquqî hate girtin. Daxwazên serbestberdan wê hene, lê Nivîsgeha Dozgeri ya Sana yê, ku di bin kontrola Koma Ensar Elah El-Husîyîn de ye, ev daxwaz red kir. Ez hêvî dikim ku rêxistinên civaka sivîl dê rabin û bi baldarî piştgiriya miwelîla min bikin."

Çavkaniyên mafên mirovan piştrsat kirin ku rewşa psîkolojîj a İntîsar El-Hemadî xirabe. Tevî kampanyayên ku ji hêla çalakvanên civaka sivîl û parêzvanên mafên mirovan ve li Yemenê hatine dest pê kirin, rayedarên Sana yê, binçavkirina jina ciwan İntîsar û hevalên wê heya vê kêliyê berdewam dikin.