ÎMAN SEMÎR ELÎ

Misir – Tevî dijwarbûna ezmûna xwe û şert û mercên wê yên dijwar, Sena Mohamed Cehîna ku wekî "Samar" tê nasîn, nehişt ku veqetîna wê bibe destpêka serkeftinê. Jina 36 salî ya xelkê gundê Banî Mur, Assîut, biryar da ku bibe qehremana jinekê ku bi pereyek hindik dest pê kiriye û bûye xwediya karsaziyek serketî û mînak.

Aboriya malbata wê ne baş bû

Sena Cehîn di sala 2015’an de ji ber nakokiyên malbatî zewaca xwe bidawî kir û destnîşan kir ku wê demê ew dayîka du zarokan bû, yek ji wan sê salî bû û yê din jî kêmtir ji mehek û nîv bû. Sena di nav şert û mercên darayî yên dijwar de vegeriya mala malbata xwe. Xwişka herî mezin a sê birayan ku nekarîn lêçûnên zarokên wê bidin bû. Ji ber ku yek ji wan di leşkeriyê de xizmet dikir û yê herî biçûk jî hîn diçû dibistana seretayî.

Feraseta civakê dibû kelem

Sena di pîşeyên cûrbecûr de dixebitî, lê nekarî xwe bighîne dikandar an xerîdaran. Têgihîştina civakê ya li ser jinên berdayî bes bû ku ruhê wê kêm bike. Wê dît ku nikare di nav van biryarên dijwar de berdewam bike, her çiqas armanca wê ya yekane ew bû ku debara jiyana her du zarokên xwe peyda bike jî.

Destpêkê tenê 3 Dolarê wê hebû

Bi demê re, biryar da ku xwe bispêre xwe û bi dayîna dersên taybet a ji xwendekarên gundê xwe re ya li malê dest rêwîtiya xwe kir. Ji bo teşwîqkirina wan, wê ji wan re hin aksesûarên hêsan wekî diyariyan çêkir. Lê belê, bi destpêkirina betlaneyên dibistanê re, çavkaniya dahata wê rawestiya. Di heman demê de ew bêhêvî hewceyî peydakirina dahata darayî ya ji bo her du zarokên xwe bû. Wê demê tenê 20 lîreyên Misrî, an jî nêzîkî 3 dolarên wê hebûn. Ji ber vê yekê ew çû bazarê û hin pêdiviyên hêsan kirî. Sena dest bi çêkirina aksesûarên biçûk ên destçêkirî kir û wan firot cîran, nas û gundiyan.

Beşdarî pêşengehê bû

Di demek kurt de wê hevalek ku di heman zeviyê de dixebitî nas kir. Hevala wê alîkariya wê kir ku materyalên xav bipêş bixe û bikire. Bi demê re, Sena projeya xwe berfireh kir û sermayeya xwe zêde kir. Wê ji bo kirîna kelûpelan bi mîqdarên mezintir û bi bihayên kêmtir, bi dabînkerên li Qahîreyê re têkilî danî. Her wiha ji bo nîşandana berhemên xwe li pêşangehan alîkarî ji rêxistin û komeleyên civaka sivîl xwest û cara yekem beşdarî yek ji pêşengehên bajêr bû. Sena Cehîn dibêje ku her çiqas wê demê telefona wê ya mobîl a sade hebû û alavên pêwîst tunebûn jî, wê jimara xwe ya mobîl li xerîdar û beşdarên pêşangehê belav kiriye û wan agahdar kiriye, gotiye hûn ku dikarin her fermanên "destçêkirî", ango tiştên destçêkirî, temam bikin.

Rastî gelek binpêkirinên qirêj hat

Piştî demekê, ji bo kesên ku di cûrbecûr karên destan de dixebitin pêşengehek hat lidarxistin. Sena beşdarî wê bû, serkeftinek mezin û populerbûnek berfireh bi dest xist. Pêşengeh du salan dom kir, heta ku hat girtin û careke din ew bi dijwariyan re rû bi rû hişt, hemû kelûpelên wê bi bihayên kêm dihatin çêkirin. Sena destnîşan kir ku derketiye kolanan û berhemên xwe li ser dîwarê rêya "Ehl Assiut" di nav matmayîn û şermezarkirina rêwiyan, xizm û gundiyan de nîşan daye. Sena rastî gelek awayên tacîzê hat; Hin kesan pere pêşkêşî wê kirin, hinekan hewl dan destdirêjiyê lê bikin, hinekan jî êrîşî navûdengê wê kirin.

Lêçûnên tenduristiya bavê wê jî lê zêde bûn

Lê kesî şert û mercên jiyana wê an jî têkoşînên wê yên rojane li ber çav negirt. Sena tenê dixwest ku lêçûnên bijîşkî yên kurê xwe bide. Emrê kurê wê sê sal û nîv bû, ji hêla norolog ve dihat dermankirin. Ji bilî dabînkirina xwarin û vexwarinê ji bo her du zarokên xwe, bi vê pirsgirêkê re jî mijûl dibû. Sena diyar kir ku êşa wê li wir bi dawî nebûye. Di dema belavbûna vîrusa koronayê ya li Misrê de, bavê wê felc bû. Lêçûnên darayî yên mezin hewce dikir. Tevî qedexeya derketina derve jî, ew her roj heta saet 5:00’ê êvarê derket kolanan da ku berhemên xwe bifroşe.

Hevjînê wê jê xwest ku dikana xwe bigre

Piştî salan têkoşîn û sebrê, dikana xwe ya yekem li Assîutê vekir. Ji firoşkarek li ser rêyan veguherî xwediya dikanek. Lê belê, ji zextên civakî bêpar nebû. Piştî zewaca wê ya duyemîn, nakokî di navbera wê û mêrê wê de derketin. Hevjînê wê xwest ku Sena dev ji karê xwe berde, lê wê red kir. Sena Cehîn da zanîn dema ku cara duyemîn zewiciye, nakokî li ser kar û dikanê dest pê kirine. Hevjînê wê dixwest ku ew dev ji karê xwe berde û dikanê bigre. Dema ku wê red kir, zilam got an min bibjêre an jî kar. Sena kar hilbijart û piştî sê mehên zewacê, ji wî veqetiya. Sena tekez kir ku ew ê rê nede kesî ku hewldan û têkoşîna wê winda bike.

Dixwaze beşdarî pêşengehên li Kendavê û Ewropayê bibe

Sena beşdarî pêşengehên navnetewî bû û beşdaran pesnê berhemên wê dan û piştgirî dan van berheman. Sena her wiha dixwaze beşdarî pêşangehên navneteweyî yên li Kendavê û Ewropayê bibe. Sena destnîşan kir ku berhemên wê li bajarên cuda yên Misrê tên firotin û ji xerîdaran re li her derê tên şandin. Sena dest bi organîzekirina atolyeyên perwerdeyê ji bo keçan jî kiriye da ku hunerên destan fêrî wan bike. Sena Cehîn xeyal dike ku xwediya yekem kargeha destçêkirinê li Misira Jorîn be, madeyên xav ji Çînê bikire û karsaziya xwe berfireh bike da ku berhemên xwe bişîne Kendavê û Ewropayê.