گۆڤاری "رؤية المرأة" یەکەم ژمارەی لە قاهیرە بڵاوکردەوە
ژمارەی یەکەمی گۆڤاری "رؤية المرأة" بڵاوکرایەوە، کە یەکەم گۆڤارە تایبەتە بە خستنەڕووی ڕوانگەی ژنان لە ڕۆژهەڵاتی ناوەڕاست لە ڕوانگەی فێمینیست و زانستی هاوچەرخەوە.
ناوەندی هەواڵ
دەستپێکردنی گۆڤاری "رؤية المرأة" هەنگاوێکی بەرچاوە بۆ توێژینەوەی فێمینیستەکان لە ڕۆژهەڵاتی ناوەڕاستدا، بە ناساندنی وەک بەشێکی دانەبڕاو لە زانستی مرۆڤ و کردنەوەی ڕێگای نوێ بۆ تێگەیشتن لە ڕاستی کۆمەڵایەتی و سیاسی و کولتوورییەکان.
ناوەندی ژنۆلۆژی لە ڕۆژهەڵاتی ناوەڕاست کە بنکەکەی لە قاهیرەی پایتەختی میسریە، بڵاوکردنەوەی یەکەم ژمارەی گۆڤاری "رؤية المرأة"ی ڕاگەیاند، کە یەکەم گۆڤاری ئەکادیمی و ڕۆشنبیری و سیاسی تایبەتمەندە و تایبەتە بە خستنەڕووی دیدگای ژنان لە ڕۆژهەڵاتی ناوەڕاست لە ڕوانگەیەکی فێمینیستی هاوچەرخەوە.
ئەم ژمارەیە نوێنەرایەتی پێشکەوتنێکی بەرچاو دەکات بۆ توێژینەوە فێمینیستەکان لە ناوچەکەدا، سەکۆیەکی توێژینەوە و هزری دابین دەکات کە دەنگی ژنان وەک بەشێکی دانەبڕاو لە زانستی مرۆڤ گەورەتر دەکات.
ژمارەی یەکەم کە لە مانگی نیسانی ئەمساڵدا بڵاوکرایەوە، کۆمەڵێک بابەت و لێکۆڵینەوەی بەرفراوان لەخۆدەگرێت کە لە گۆشەنیگای کۆمەڵناسی، سیاسی، کولتووری و دەروونییەوە باس لە پرسەکانی ژنان و کۆمەڵایەتی دەکەن، تیشک دەخاتە سەر شیکردنەوەی ڕاستیە کۆمەڵایەتییەکان و پێشکەشکردنی ڕێباز و چارەسەرەکان لەسەر بنەمای نوێترین لێکۆڵینەوەکانی دەروونناسی، کۆمەڵناسی و ئەنترۆپۆلۆژی.
”دیدێکی هزری نوێ بۆ خوێندنەوەی جیهان”
گۆڤارەکە لە سەردێڕەکەیدا پرسیارێکی سەرەکی دەخاتە ڕوو: ئێمە جیهان چۆن دەبینین؟ لە چ گۆشەیەکەوە دەیخوێنینەوە؟ هەروەها ئەم ناونیشانە ڕەنگدانەوەی باوەڕێکە کە سەدەی بیست و یەکەم شایەتی گۆڕانکارییەکی قووڵە لە پێکهاتەی بیری مرۆڤدا.
ئەو ململانێ نەریتیانەی کە تایبەتمەندی سەدەی نۆزدە و بیستەم بوون، وەک ململانێی چینایەتی و ئایدیۆلۆژی، پاشەکشە دەکەن لە بەرژەوەندی ململانێیەکی بنەڕەتیتر سەبارەت بە پێکهاتەی هۆشیاری و پەیوەندی نێوان ژن و پیاو، دەسەڵات و ژیان و زانست و کۆمەڵگە.
جەخت لەوە دەکاتەوە، کە ئەم گۆڕانکارییە پێویستی بە دووبارە خوێندنەوەی ڕاستی هەیە لە ڕێگەی دیدگایەکی فێمینیستی ڕەخنەگرانە، دیدگایەک کە دووبەرەکییە نەریتییەکان تێدەپەڕێنێت و لە هەموو ساتێکدا بەدوای ئەگەرەکانی ئازادیدا دگەڕێت، ئیلهام لە ئەزموونە مێژووییەکانی ژنانی ناوچەکە و جیهان وەردەگرێت.
”پلاتفۆرمێک بۆ گفتوگۆ و دووبارە دۆزینەوە”
گۆڤاری "رؤية المرأة" ئامانجی ئەوەیە کە کەشێکی زیندوو بێت بۆ دیالۆگ و بیرکردنەوە، سەکۆیەک بۆ دووبارە دۆزینەوەی شوناس و مێژووی فێمینیست، لەڕێگەی بابەت و لێکۆڵینەوەکانەوە کە باس لە پرسیارەکانی شوناس و بوون دەکەن، ژن کێیە؟ چۆن دەژی؟ چۆن پەیوەندییەکەی لەگەڵ جیهاندا پێناسە دەکاتەوە؟
دەستەی سەرنوسەر ئاماژە بەوەدەکات، پرسی فێمینیست بابەتی گروپێک یان ڕەگەزێکی دیاریکراو نییە، بەڵکو پرسێکی کۆمەڵایەتییە، چونکە ناهاوسەنگی لە پەیوەندی نێوان ژن و پیاودا ڕەنگدانەوەی قەیرانێکی قووڵترە لە پێکهاتەی هزر و دەسەڵاتدا، بۆیە گۆڤارەکە پێی وایە هیچ پرۆژەیەکی کۆمەڵایەتی یان هزری ڕاستەقینە ناتوانێت ئەم کێشەیە پشتگوێ بخات یان دوابخات.
”ناوەڕۆکی زانستی و کولتووری هەمەچەشن”
ژمارەی یەکەم شیکاری قووڵی پرسە کۆمەڵایەتی و ئابووری و کولتوورییەکان لەخۆدەگرێت، جگە لەو بابەتانەی کە پێداچوونەوە بە ئەزموونی ژنان لە ڕۆژهەڵاتی ناوەڕاستەوە دەکەن و مێژوو لە ڕوانگەیەکی نوێوە لێکدەدەنەوە کە تیشک دەخاتە سەر ڕۆڵ و بەشدارییەکانی ژنان، هەروەها ئەم پرسە ڕێبازە زانستییە سەردەمیەکان دەخاتە ڕوو بۆ تێگەیشتن لەو ئاڵەنگاریانەی ئەمڕۆ ڕووبەڕووی ژنان دەبنەوە، هاوشانی گەڕان بەدوای ئەگەرەکانی گۆڕانکاری و بونیادنانی داهاتوویەکی دادپەروەرانەترە.
ناوەندی لێکۆڵینەوەکانی ژنۆلۆژی لە ڕۆژهەڵاتی ناوەڕاست دووپاتی دەکاتەوە، کە بڵاوکردنەوەی گۆڤارەکە سەرەتای گەشتێکی دوور و درێژە بە ئامانجی دووبارە لێکۆڵینەوە لە پرسیارە بنەڕەتییەکان سەبارەت بە مرۆڤایەتی و کۆمەڵگە لە ڕوانگەیەکی فێمینیستەوە، هەروەها بونیادنانی کەشی زانین کە تێیدا بیرکردنەوە، سیاسەت، مێژوو، ئەدەب و هونەر کارلێک دەکەن، بە داننان بەوەی کە گۆڕانکاری ڕاستەقینە لە یەک کایەدا بەدەست ناهێنرێت، بەڵکو لە ڕێگەی کارلێکی گشتگیرەوە لە سەرانسەری جیهاندا ئاستی جیاوازی هۆشیاری.
گۆڤارەکە ئاواتەخوازە دەنگێکی داهێنەر بێت کە سەرلەنوێ شیکردنەوە و گەڕان بەدوای مێژوودا، سوود لە ئەزموونی ژنان لە ڕۆژهەڵاتی ناوەڕاست وەربگرێت بۆ بونیادنانی داهاتوویەکی باشتر بۆ هەموو ژنان.